Brava (dise Imeneo) brava, v'intendo:
E voltandose a Amor: caro fradelo,
El sozonze, da tí mi no pretendo
Che ti sii calpestà da questo e quelo.
Quel nobil cuor ti pol ferir, volendo,
Ferissi pur, ma son qua mi per elo;
Vogio ch'el dardo sia degno de ti,
Degno del Cavalier, degno de mi.
E po, el seguita a dir: caro compagno
De le mie bele memorande imprese,
No sarìa per nu altri un bel vadagno,
Un piaser no sarìa de sto paese
Che cascasse la mosca in boca al ragno,
Che nostro fusse el Cavalier cortese?
E no te basterìa per vendicarte
Che vegnisse Sier Piero a suplicarte?
Sentime, caro ti, se sta Damina,
Che l'à fato per rabia bestemiar,
Con qualche vezzo o qualche parolina
Col to mezo lo fasse inamorar,
No la sarìa vendeta soprafina,
Che te farìa dal popolo stimar?
E s'el vegnisse a domandar pietà,
No se dirave: Amor s'à vendicà?
