Pagina:Collezione delle migliori opere scritte in dialetto veneziano 6.djvu/76

Da Wikisource
Sta pagina la xe stà trascrita, ma la gà ancora da vegner rileta.
EL VISIR E L'ANELO


1Al Cairo, circa setant'ani fa,
     Kalù bizaro, prodigo Bassà
     D'una de quele coe che val per tre,
     À fato un dì chiamar per el lachè
     El so prete de casa, un bon Dervì,
     Savio, prudente, e 'l ga dito cussì:
     Belchù, varda sta gema: te dirò
     Per chi l'à da servir. Za de ti go
     Prove che basta: tiola donca su,
     La deposito in man de la virtù.
2Queste xe borse piene d'oro. Va,
     Zira l'Asia, l'Europa, le cità,
     Le vile, i borghi, le moschee, i cafè,
     E pesa le pazzie quante le xe;
     E co ti trovi (giudica pur ti)
     El mato più solene de sti dì,
     Faghe a l'uso oriental un prostinò,
     Metighe in deo l'anelo, e dighe: tiò,
     Questo è 'l tributo del Bassà Kalù;
     E in quatr'ani te aspeto. Adio, Belchù.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Collezione_delle_migliori_opere_scritte_in_dialetto_veneziano_6.djvu/76&oldid=69956"