1Co vedo l'omo nel so bel aspeto
Pianzer sul mal che i so fradeli agrava,
Smezzar con lori el pan, la vesta, el leto,
Difenderlo, scusarlo, e senza bava,
Senza velen coreger el difeto,
Contentarlo el capon come la fava;
Me lo perdoni Idio! no cambiaria
Co un genio celestial la sorte mia:
2Ma co a la mente me presento st'omo,
E pien de ingani e de malizia el vedo
De la natura sbregar suso el tomo,
Far che doveri e norme e legi e credo
Deti amor proprio, e con ingano somo
Robar, scanar, e far morir da fredo,
Vorave aver zuzzà da un'orsa el late,
E andar, Dio mel perdoni, in quatro zate.
3In tempi cussì tristi, che za folta
Xe la zente e corota, e dove scorla
La fiacola infernal discordia stolta,
Dove ambizion, e ipocrisia sa torla
