28Alora se va in leto in santa pase,
Ch'el zorno Citadin za xe spario,
E in brazzo al sono tuti i sensi tase,
Tuto quanto el bon ton xe sepelio.
Nè 'l sol ardisse entrar ne le so case,
Che quando mezzo el corso el ga finio,
E qualche volta mai, che qua sta 'l ben,
Viver in casa dov'el sol no vien.
29Xe insolenti i so ragi a chi xe avezzo
Viver al dolce lume de candela;
I scovre tropo, e no i ga mai quel vezzo
De confonder la bruta co la bela.
Xe la zentagia che ghe dà sto prezzo,
Qualche poetastro e qualche sciocarela:
In suma tuti quanti quei animali
Che gode de le cosse naturali.
30Ma se se svegia e torna un altro zorno
Come xe quel che v'ho descrito adesso.
Varia i trati, per altro, ma 'l contorno
Poco su, poco zo sempre è l'istesso.
Fa de le impertinenze chi xe storno,
Le bele se desmentega el so sesso:
Gh'è mascherae, ghe xe cene e bali,
E ghe xe i rendevù sentimentali.
31Perchè la vista non aver da lince
E trapassar quei misteriosi muri?
Se vederia chi ardito assalta e vince,
E i fredi amanti che no xe sicuri;
