14Co 'l teatro xe pien, e che la fola
Ve fa star fissi, uniti e ben stivai,
Xe un caldeto gustoso che descola;
E se per acidente se' suai,
Vien l'aria de la porta, e la consola;
Se a l'incontro se' pochi e sparpagnai,
Xe fredo è vero, ma lo fa scordar
Le visite geniali e 'l sussurar.
15Quel sussuro gentil che mai no fala
Se no al momento che se ascolta i bali,
Più grato assae de quel de la cigala,
Che missià coi strumenti musicali
Forma de toni una diversa scala,
E fa che dei melodiosi ammali
No se senta la vose che in confuso
Per sbaterghe, o fischiar secondo l'uso.
16Gh'è dei zuconi che se fica in testa
De spender i so bezzi per sentir,
Pensando che per lori sia la festa,
E invece i fa el teatro devertir.
I taroca, i cria zito, i fischia, i pesta;
E a le bele, che mai la vol finir,
Da brutali, i ghe dise, sfondradone,
E tuti ride, e ride anca ste done.
17Xe po el teatro silenzioso e quieto
Co gh'è un tendon da novo, o qualche scena
D'un soteraneo, o pur d'un bel tempieto,
O sul momento del rondò in caena;
