In un certo Casin de compagnìa
Una ventosità bela e sonora
À trato una Signora.
E sicome diversi l'à sentìa,
5Ghe xe vegnù, ch'è natural, sul viso
Do' rossi a l'improviso;
Ma suponendo de poder far creder
Che fusse stà el strissar del careghin
Che la gera sentada, e no el martin
10Che à sonà la trombeta,
La andava via movendose,
Strissando el careghin, malizioseta.
Ma morbinoso el Cavalier servente,
Che ghe gera d'arente,
15Gh'à dito: La pol far
Cussì quanto ghe par,
Ma mai la ariverà
A far come che prima fato l'à;
E à savesto la cossa in sta maniera
20Anca quei che inacorti no se gera.
Per voler ocultar certe cossete
Più in vista le se mete.
