Inter vivos? Per Dio, l’è parlar schieto,
57Sora de che niente ghe xe da opor.
Ma za che d’acordarme l’è costreto
Ch’altro senso no gh’è che ’l leteral
60Al qual s’abia da star e andar sogeto;
Con tuta la so’ boria magistral,
Quando ch’el sia de corpo e mente san,
63E l’abia la potenza natural,
Vorìa ch’el me disesse, se per man
D’altri sta Lege mai sia stà segnada
66Che dal Comun, che xe ’l Corpo Sovran
De sto Governo, e se ghe sia stà dada
In alcune ocasion mai al Senato
69Sta podestà, che sol xe riservada
A quel Corpo che forma el Prencipato,
Senza che se vegnisse a sconcertar
72L’armonia de le Parti de sto Stato?
Sior Piero, m’averè da perdonar
Se doverè sentirme tropo spesso
75Sta medesima cosa a replicar.
No l’è mia debolezza, vel confesso,
Ma forse una sofistica premura
78Che nel Giudice el ponto resti impresso;
E molto più co l’è d’una natura
Che rachiudendo in sè el più sugoso
81De tuta la materia chi el trascura
Perde el più sostanzial e ’l più nervoso.
Ma perchè su sto afar d’Opere Pie
