I MERITI DI UN RAGIONATO
Cossa diavolo xelo sto Rodela,
Che dopo aver falìo in so’ zoventù,
In tanto gran conceto l’è vegnù
4Che nissun ghe pol star gnanca a copela?
La cabala el la ga giusto in scarsela
Per farghene quel ziogo ch’el vol lu;
Ma per descogionarse de costù
8Mi sì che so quale sarìa la bela!
Tuti ciga ch’el se meritarìa
Sto gran Ministro che ghe dessi imbarco
11Tra i condanadi sora una Galìa;
Ma mi, che più d’ogni altro ghe rimarco
Le so’ gran qualità, lo manderìa
14In mezo a le colone de san Marco.
