Pagina:Coletti - Poesie postume in vernacolo veneziano, Venezia, Gattinoni, 1889.pdf/95

EL SONADOR DE MANDOLIN

(Nell'Album di Ernesta Manin, sorella di Daniele e moglie di Girolamo Viezzoli: a rincontro d'un disegno a penna di Eugenio Bosa col motto: «Ma no gh'è più da far ben.»).

Mandolin, che da per tuto,
Sia d'inverno, sia d'istà,
Fusse 'l tempo belo o bruto
Ti m'à sempre acompagnà;
Vero amigo, amigo stabile,
No de quei che va e che vien,
Ti xe ancora fedelissimo,
Ma no gh'è più da far ben.