»Osservava da l'alto i do guerieri
»Co l'ochialeto per curiosità
»Sta scena de tragedia de l'Alfieri:
»I dà el filo a la mela co un salà,
»I mola de cariera i so pulieri....»
Qua el manoscrito manca, che pecà!
Chi sa come à fenio sto tibidoi?
Ma el resto xe andà in brodo de fasioi.
Conte Beneto, vu che metè via,
No minga come dise i criticoni
Qualunque bagatela e strazzaria,
E le carte petae per i cantoni;
Ma fior de roba, bona mercanzia,
Libri, stampe, medagie, medagioni,
Ogeti d'arte, antichità diverse,
Memorie vechie, che andarave perse:
Vu che gavè la coa de Berenice,
La spada co la meola de Sanson,
La cogoma che usava Beatrice
Co Dante ghe sbateva el zabagion:
Mezo palco bruzà de la Fenice,
El modelo del primo patelon,
I cavieli de Venere in composta,
E un subioto che sona da so posta;
