III.
Così scominçia el zugo del capelo:
Mi ho guardado sui libri con passion,
e i m’ha risposto: l’è un zughèto belo
sul genere del vostro cotilion.
Una dama te çerca questo e quelo
cavalier, la ghe parla de scondon:
ride la viola e pianse el violonçelo,
tuti se move e nasse confusion....
Ma de solito capita ben questa:
I du più furbi, che conosse el zugo,
arivadi a sto punto de la festa
i se incontra nel giro de la spala,
e, fin che el terzo fa da pampalugo,
da brai morosi i se la conta e i bala.
