XXI.
El Viazador.
********
Dovea andar aa Venezia un contadin,
E per no farse credar babuin,
Sicome nol ghe gera mai più stà,
De tor el s'à pensà
Su quel paese qualche informazion.
Fra l'altre cosse un vechio so compare
L’ha messo in avertenza,
Che i barcarioi parlando
Dopara sempre in ao la desinenza. —
Eh! lassa far a mi,
Savarò regolarme.— In fati un dì
Avendo vogia de passar tragheto,
E vedendo el batelo a l'altra riva
El se mete a zigar: Barcarolao
Vegnì de quao, che voi passar de lao.—
Vara là, che squartao
Vilan cagadonao!
Ghe responde de bota el barcariol
Rabià come una bestia;
Ma lu no se scompone, e contenton
El pensa invece, che gavea rason
Quelo che gavea dà l'informazion.
