TOLIMELA, SIGNOR!....
A me morosa quando son de bona
Ghe digo un saco de frasete bele:
Par mi te sì la meio de Verona,
Te sì ’l campion de tute le putele...
Te gh’è quel bel risseto che ’l te dona,
Te gh’è du oci che i me par dò stele,
Te ghe somej tuta a la Madona...
Te ’mpissarea davanti dò candele.
Par mi te si la rosa senza spina,
La stela del presepio del me cor,
El sol quando che ’l leva de matina,
L’ucia1 che ponze e che no' dà dolor...
Mi te voi ben che no g’hò più retegno:
Tolìmela, Signor, che no son degno!
- ↑ ucia ― ago.
