Pagina:Attilio Turco - Sonetti Veronesi.djvu/34

LA MUSINA

’Na volta la m’à dito me morosa:
     — Vu-to che femo un poca de musina?...¹
     Soto la ciave² de ’sta cassetina
     Metemo via ogni giorno qualche-cosa...

Fando³ la spesa in piassa a la matina,
     S'anca ai bancheti i me dirà tegnosa,
     Voi, par quel tempo che sarò to sposa,
     Spilarghe fora⁴ qualche palanchina...

E ti sèrca de far economia...
     Qualche goto de vin... qualche toscano..
     No se sa mai..., se vien 'na malatia..

Gavemo da ’na parte qualcosseta..
     E pò, te sè... te m’è promeso st’ano...
     Al giorno del me nome.. ’na bluseta. —

1. musina - salvadenaro;
2. ciave - chiave;
3. fando - facendo;
4. pilarghe fora - tener indietro.