Pagina:Attilio Turco - Sonetti Veronesi.djvu/29

Da Wikisource
Salta a ła navigasion Salta a ła riserca
Sta pagina la xe stà trascrita, ma la gà ancora da vegner rileta.
LA MAGNA...


La me morosa, tuti i la conosse,
     L'è bela che la par ’na madonina;
     La g’à do’ ganassete1 bianche e rosse,
     Sensa sbeleto2 e senza l'anelina;

La g’à davanti un par de bocie grosse
     Che le ghe bala, quando la camina,
     E, se la tira un colpetin de tosse,
     El par che se ghe s-ciopa la buslina!

E l’ altretanto bona, quanto bela,
     La sgoba note e giorno e giorno e note,
     Par farse su ’na fregola de dote...

Insomma l’è ’na perla de putela;
     E no’ me ris-cio3 a farla me’ compagna,
     Volìo saver, parchè?... parchè... la magna!

  1. ganassette - guance;
  2. sbeleto - belletto;
  3. ris-cio - rischio
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Attilio_Turco_-_Sonetti_Veronesi.djvu/29&oldid=71400"