EL SE MARIDA PRESTO....
L’era poco de bon, lo savea tuti;
El savea za cucà1 do’, tre condane,
L’andava via coi pèso farabuti
E ’l conosseva tute le... ortolane!
El fasea sempre dei discorsi bruti...
E l’era svelto de menar le mane:
Un giorno el s’à tacà con du dai fruti
E ’l j’à fati star mal do setimane!
Ma i l'à ciamà sodà, l’è andado in guera,
Cosa è sucesso po’, gnessun lo sà,
El s’à voltà cossì ’n te ’na maniera
Che tuti quanti i s’à maraveià;
Ancà l'è un omo serio, bravo, onesto,
Ma par disgrassia... el se marida presto!
- ↑ Cucà ― preso.
