PASSA I FRANCESI
I soldadi francesi, col so’ brio,
I passa par le strade de Verona;
Davanti i g’à la musica che sona
E marmite che fuma par de drio!
Le ortolane de piassa le ghe dona
Pomi e castagne e le ghe siga — adio!
Andè coi nostri e fè che i paga el fio
Quei remenghi de Casa-patatona! —
Le signorine le ghe buta1 i fiori,
Missiadi su coi basi e coi nastrini;
E i mostri2 i salta e i fa alegria ’nca lori!
Tuti i bate le mane volentiera,
Parchè, i lo sà, che ’sti fradei latini,
I vien par far che termina la guera!
