Pagina:Attilio Turco - Sonetti Veronesi.djvu/121

I DOLSI

Me morosa, 'sto sbrico¹ de ’na fiola,
     La s'à impienì ’l comò² de caramele,
     Confeti, siele d’orzo par la gola,
     Pastafrole, basini³ e brassadele.

Quanto l’à spèso, la lo sà ela sola;
     Mi no ghe guardo ’n te le so scarsele...
     Un giorno, che ò ris-cià⁴ mesa parola,
     Mostra, de-boto, la me fa la pele!...

Ma, sensa domandarghe, mi ò savù,
     Che l’à impienì ’l comò, parchè momenti
     La roba dolse no i la vende più.

Così, si ben che vegnarà ’l decreto,
     La me morosa la se grata i denti...
     E la me resta dolse... un bel tocheto!

1. 'sto sbrico ― questa biricchina;
2. comò ― canterano;
3. basini ― amareti;
4. ri-scià ― arrischiato;