Pagina:Attilio Turco - Sonetti Veronesi.djvu/110

AL FRONTE

Andove 'ndeo¹ col zaino su la schena
     E con tuti i pensieri che ve pesa,
     Curvadi come i volti de na cesa...
     Pori soldadi?... Me fè tanta pena! —

— Che pena!... in longa brigola² destesa,
     Par quel amor, che tuti ne incadena,
     Che el ne dà tanta forsa e tanta lena,
     Andemo de l’ltalia a la difesa! —

— Coraio, brai!³ ve mando un baso a tuti;
     Vorea brassarve insieme tuti quanti,
     Farve i me auguri e darve sento aiuti!...

E compagnarve al fronte e avanti, avanti!...
     Versarve el passo e, nei momenti bruti,
     Dèsmissiar le madone e tuti i santi!...

1. Andove ’ndeo ― Dove andate;
2. brigola ― fila;
3. brai ― bravi.