Pagina:Assedio de Venezia.djvu/64

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.



LVI.


Sì, me xe morte, alora, quele sante
De mìa muger e de mìe fìe... 'na fiola
Me xe restada... E note e dì l'ò piante
E 'l pianto ancora el me s'ingropa in gola.

E le me xe mancae tute, distante
Una da l'altra... el còlara!... Una sola
Morir no ghe n'ò visto... una, de tante,
No l'à podesto dirme una parola!

Mi, se fusse stà Dio, tuti i tormenti,
Che cò st'altre miserie el n'à mandà
E che muger e fioi vìa n'à portà,

Mandai ghe l'avarave a colù là
Che stava a Viena e a tuti i so parenti
Più prossimi, presenti e dissendenti!

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Assedio_de_Venezia.djvu/64&oldid=61839"