XXIX.
Sirtori e Rossarol, dei veri eroi,
Cosenz e Cataben, dei prodi veri,
Ghe dise a quei: — Gavete a far con noi!
E i li fa tuti quanti presonieri.
Se stai quel dì fussi a Venezia, fioi,
(E tuto questo me par nato geri!)
Che i ga portà canoni e... cossa sòi?,
Cari e bagagi tolti a quei braghieri!
A festa le campane le sonava
E 'l son de le campane el se missiava
Coi zighi de: — Viva Samarco!.... viva!.... —
Tuti in Piazzeta, in Piazza o su la Riva
Tuti quanti, co l'anema giuliva,
Come fora de nù, se se basava!
