VIII.
Un Manin gera sta l'ultimo dose
De la vecia Republica, pocheto
I dise e un conìo vero a quanto ò leto:
E, savè, co gh'è i deti gh'è le nose.
Prima che quà sia capità quel dreto
De Napolon, ga çircolà le ose
Che 'l gabia dito co le man in crose:
— Semio sicuri nù, stanote, in leto?
Ma compensarne pò Dio ga volesto,
Co un tut'altro Manin, dopo çinquanta
Ani — e a Venezia, fioi, l'à manda questo.
E un Avesani e un Tomaseo lù atorno
Ga messo e tuti repossà 'na s'cianta
No i ga, per sta çità, note nè zorno!
