In una vila assae lontan de quà
Senza poderve dir se al monte o al pian
Amigo del bon vin cent'ani fà
Se la passava comodo un Piovan,
Cordial de fondo, e pien de umanità
Finchè durava el zorno, ma vilan
Rustego, brontolon, co mezzo coto
L'alzava tropo su la sera el goto.
Oltre do Gati, el Can, la so Massera
Un Musso in stala, e in cheba un oseleto
Da un fradelo birbon che morto gera
Dopo aver zà venduo Mugier e leto
Do Nezze gh'è resta che andava in Fiera
Se no ghe dava el Paroco riceto,
E da questo capì se galantomo
Gera de fondo el Paroco, e bon Omo.
Bei musi tute dò: una moreta
Ben provista de tete, e de culate,
L'altra de pelo biondo, ma scarmeta
Sentimental, e bianca più d'un late;
La prima se chiamava Siora Beta
Longa de lengua, e l'altra Siora Cate,
Dobocoli de riosa, e senza afani
Perchè zà tute dò sul fior dei ani.
Zornaliera ispezion de ste sorele
Gera de andar el Barba a dismissiar
Co apena dando logo al Sol le stele
Se sentiva i matini sbatochiar,
De provederghe ai Gati le so anguele
Al Canarin le seme per cantar,
D'aver l'ochio a la carne, e a la stagnada
E de darghe per tempo una spiumada.
Pagina:Poesie e satire di Pietro Buratti veneziano.pdf/4
Sta pagina la xe stà trascrita, ma la gà ancora da vegner rileta.