No steme tormentar

by Ugo Urbanis

4 No steme tormentar Ugo Urbanis 1891 XIX Canzonete triestin

Indice:Trieste vernacola.djvu

Ugo Urbanis

No steme tormentar

1891

Edission original:	Trieste vernacola, Antologia della poesia dialettale triestina, a cura de Giulio Piazza, Milano, Casa Editrice Risorgimento R. Caddeo & C., 1920
Fonte:	Indice:Trieste vernacola.djvu

Edission e fonte ▼

NO STEME TORMENTAR.

I.

Fazzo l'amor, xe vero,
Cossa ghe xe de mal?
Volè che a quindes'ani
Stia là come un cocal?^[1]

Se tuto el santo giorno
Sfadigo a lavorar,
Xe giusto che la sera
Me fazzo compagnar;
Fazzo l'amor, xe vero.
No steme tormentar.

II.

Vado a nudar,^[2] sicuro,
Cossa ghe xe de mal?
Co sto tantin de caldo^[3]
Xe più che natural.

Go el vestidin setado,^[4]
E se anca i vol guardar,
No son cussì malfata
De averme a vergognar;
Vado a nudar, sicuro
No steme tormentar.

III.

Vado a balar, xe vero,
Cossa ghe xe de mal?
Saltar a l'età mia
No xe un pecà mortal.

Se gira e se se sburta^[5]
E se se fa strucar,^[6]
Se torna a casa morte
E in piè no se pol star;
Vado a balar, xe vero,
No steme tormentar.

IV.

Vado su e zo pel Corso,
Cossa ghe xe de mal?
Go el moro che me speta
Tacà soto el feral.^[7]

El xe una macia,^[8] el scherza,
No 'l fa che stuzzigar,
No 'l vol che sti dedini
Se strachi a lavorar;
Vado su e zo pel Corso,
No steme tormentar.

V.

Vado al velion stasera,
Cossa ghe xe de mal?
Son giovine, son bela,
E semo in carneval.

In maschera se ridi
A farli bazilar,^[9]
E a qualchidun la zena
Se ghe la pol scrocar;
Vado al velion stasera
No steme tormentar.

VI.

(con vose de vecia)

Son vecia e son in tochi,^[10]
Questo ghe xe de mal.
Me tocarà, capisso,
Finir al ospedal.

Purtropo go finido
De farme cocolar,^[11]
E za che no i me guarda
Me sfogo a tabacar,
Ma chi bazzìla, mori;
No steme tormentar.

---

Note

1. cocal, alcione
2. nudar, nuotare
3. co sto tantin de caldo, con questo po' po' di caldo
4. setado, assettato, aderente al corpo.
5. se se sburta, ci si spinge
6. strucar, abbracciare
7. tacà soto el feral, fermo impalato sotto al fanale
8. El xe una macia: è un tipo ameno.
9. a farli bazilar, a farli ammattire
10. son in tochi, sono a brandelli, cioè son ridotta in misero stato
11. cocolar, accarezzare.