El Goffredo del Tasso cantà alla barcariola/Lustrissimo, e Celentissimo sior

by Tomaso Mondini

DEDICA

../L'Auttor al Libro

Tomaso Mondini

El Goffredo del Tasso cantà alla barcariola

DEDICA

1693

Edission original:	Tomaso Mondini, El Goffredo del Tasso cantà alla barcariola, dal dottor Tomaso Mondini, e dedicà al lustrissimo, e celentissimo sior Francesco Duodo, Venezia, Lovisa, 1693
Fonte:	Indice:El Goffredo del Tasso cantà alla barcariola (1693).pdf

Edission e fonte ▼

L'Auttor al Libro  →

LVSTRISSIMO,

E Celentissimo Sior

V

E prego, Gran Selenza,

     Perdonème l'ardir, la pretension,
     Si dago in protettion
     Con humile, e modesta confidenza
     Sotto alla vostra Stola
     Sto mio TASSO cantà alla BARCARIOLA.

V’hò chiolto Protettor
     Perchè me spenze’l desiderio grando,
     Che me vago coando,
     D'esser de Casa DUODA Servitor;
     Sò, che domando assae,
     Mà nome assae puol dar tanta Bontae.

No dirò, che m'hà spento
     A dedicarve sta fadiga grama
     El Merito, la Fama,
     Che sparpagna le lode à cento à cento,
     Che à tanta Fama, à tanti
     Meriti ghe vorrave altri Laoranti.

Vedirò ben, che în quello,
     Che stava là dubioso trà si, e nò,
     Al sì m’hà tratto zò,
     Disendome de farlo fora d'ello,
     El vostro Servitor
     Domenego Lovisa el Stampador.

Donca cusì resolto,
     Spierando d'eser pur no mal gradio,
     Ve dedico sto mio
     Magro Componimento; che si accolto
     Da vù’l sarà co affetto,
     Forsi, che'l vederè farse grassetto.

Altro mi no voi dir
     In sta Lirica Dedica alla moda;
     I altri in sti casi i loda,
     L’Istorie, i Libri vecchi i và à sborrir;
     Mi nò, no voi far chiasso,
     Perche’l mio fin xè dedicarve'l TASSO.

Ghe vorria do Stemane
     Noma per menzonar l'Imprese, î Honori
     Dei DUODI Senatori,
     Che ghà bù Glorie, e Cariche sorane,
     De Togati, e d'Armai
     E PIERI, e CHECHI, e tanti menzonai.

Nò, mi nò voi dir gnente
     De tanti, e tanti Morti, e manco vogio
     Metterme in t’un’imbrogio
     De lodarve'l Fradel tanto potente,
     El Selenza sior PIERO,
     Che quel sì se puol dir un Marte vero.

No voi manco de questo
     Dirghene gnanca una, e sì le è tante
     E in Dalmatia, e in Levante
     Le so Braure fatte e ben, e presto,
     Che in eterna memoria
     Le soe fole sarà Tema d’Istoria.

E si Dio­ ve concede,
     Come vogio speгar, e Sanitae,
     E vita longa assae‚
     De vederve in t’vn zorno mi ghò Fede
     Per le Vertù gloriose
     E vostre, e soe Lù General, Vù Dose.

Tanto v’aguro, e in tanto
     No sdegnè d’accettar con Cortesia
     Sta Dedica scachia
     D’un grossolan, mà pur moderno Canto;
     Che, ditto sia con pase,
     Segondo'l genio à certi no'l despiase.

Mà che’l piasa sì, ò nò
     Nè’l me basta‚ nè'l cerco; cerco nome,
     Che sto vostro gran Nome
     Staga contento sù ste Carte; e pò
     Co saverò de sì,
     Contento de st'honor sarò anca mì.

Humil. Devot. Affett. Serv.

Tomaso Mondini