- 44.
Co 'sti sogèti, xela maravégia
se ognuno tira l'aqua al so molin,
çercando farla in barba del viçin,
come no fusse 'l mondo una famegia?
'Te l'elezion po', guai se i li conségia....,
i xe scciavi al puntiglio, al dispetín:
períssa el ben de tuti a un solo fin,
che vaga súso quel che li spalegia.
Co' l'andazzo d'ancuò, co 'sti principii ―
xe natural ― de mumie e zarlatani
se impínza e Parlamento e Municipii;
e se vede ― schifosa porcaría ―
vénder el voto (l'arma da tanti ani
sognada) come bassa mercanzia.
- 45.
Xe un gran pezzo, ma me ricordo áncora
che dovea nominarse un deputato.
Concoréa dò me amici de bon stato,
e i galopíni ognun mandava fora.
Là spagheti e polastro in predicato;
quà bacalà e fasiói; vín de ua mora
da ogni parte a bizèfe, e ― come sora
via ― soldi, a chi no ghe bastava el piato.
Che lavoro de stómeghi; che spassi;
che scuola per i cuchi, a son de carte
da çento!! Oh! el contadin magna anca sassi
cò 'l pol sáver che xe tuto pagà...;
e quela volta el s'ha sgionfà in dò parte...,
ma 'l polastro vinçea sul bacalà.
