- 32.
La sapienza i proverbi ga inventà,
e me ne vien in testa mile e un...;
ghe n' dirò solo un pochi. «Mor disun
chi aspeta el cambio de quel ben che i fa.
Profeti in patria no vien tolerà.
Fradéi, cortei. Quel che serve el Comun
el fazza conto de servir nissun.
Guai per chi passa la mediocrità»
Questa xe una sentenza!!. Apena apena
che un çitadin sponta fora dal mazzo,
i ghe tagia la testa. Se la schena
nol piega a chi stà in alto de la scala,
i ghe dà del superbo, del bulazzo...;
solo le zúche i lassa andar a gala.
- 33.
Dunque dovêmio star senza far gnente
tuto el zorno? Mah!...; mi credo de no.
Basta dirghe: creature, mi ve go,
co' bon respeto,.... fora de la mente.
Senza voltarse indrio, plaçidamente —
come al mondo se fusse apena in do —
sempre avanti de longo per la so
strada, e, magari, contro la corente.
Questo xe 'l modo de tagiár le ale
a 'ste nótole insulse, invidïose,
che vede ciaro solo cò fa scuro.
Se ve n'avessi a mal de le so bale,
i se credaría grandi più del Dose,
forti, co' un déo, da rebaltar un muro.
