- 26.
E dái co' la politica!.... Magári
se podesse tegnírla da una banda!;
invece da ogni parte la comanda
ela, detando a tuti pati ciari.
Bisogno no la ga de propaganda;
le malve, i liberali, i carbonari
ognun la tira in balo 'te i so afari.....;
sín i pauloti ga ciapà quel'anda,
facendo creder che aministrazion
e politica deve star divise....,
e lori — i primi — i dà l'esempio bon.
Quando i riva al comando, i fica abasso,
anzi i spianta perfin da le raíse
i liberali che ghe xe d'impasso.
- 27.
El partito! Eco quà la gran magagna;
tuto se deve far a un solo scopo:
ch'el partito trionfa, e poder dopo
góderse bravamente la cucagna.
O, in questo, benedeta la campagna
dove l'acqua xe ciara, e al poaro giopo
che strússia tuto el dì ghe par fin tropo
de guadagnarse quel poco ch'el magna!
A furia de grupeti, de cesole,
nù se desmenteghemo alegramente
'sto nostro bel paese pien de sole,
de ricordi e speranze, de bisogni,
che par la çenerentola vivente
cazzà in cusína a masenàr i sogni.