- 14.
Discora pur de paradiso e inferno
chi no vol mai pensar co' la so testa,
e, alora, va pur ben che i ghe l'inésta
'te l'anima el timor del fogo eterno.
El galantomo mete a base e perno
de le so idee, de la so vita onesta
l'amor e 'l ben del prossimo; xe questa
la virtù che del cuor stà ne l'interno.
Chi s'imbriága, opur (arpíe schifose)
çerca, zogando, vinçer de le sôme
(anca se de scarsela i paga o i risccia),
le xe anime negre, difetose,
zente che va perdendo el so bon nome,
e, dopo el patatrac, tuti le fisccia.
- 15.
Ecoli là! Sora un tapéo verdon,
tiráe dal mazzo co' una svelta mossa,
vien tre carte; su do, come una cossa
da gnente, i múcia bezzi. L'atenzion
cresse fina ch'el Banco dise: «bon»;
po' i ciama carte o i resta, co' l'angossa
più tremenda aspetando quel che possa
dar, o tor, la fortuna. E in t'un supión
sostanze intiere quela bisca ingióte;
sparisse i múci de cartele e l'oro;
vién rovinà famegie in t'una note;
e, a la matina, palidi, desfáti,
se i va in leto no i trova mai ristoro,
perchè i pensa a refarse in pochi trati.
