- 10.
Se in campagna la tera paga tuto,
quà gavèmo comercio, industria e borsa;
queste del çitadin xe la risorsa.
e se deve cavarghine un costruto.
El contadin ga el cuor dentro una morsa
s'el vede un lampo: pòl andar distruto
co' un tempestón del so lavoro el fruto,
e 'l scapa in cesa a pregar Dio de corsa.
Ma l'artesan de la çità i lo paga
sia piôva, sia tempesta; el xe al coverto;
no toca a lù pensarghe.... e che la vaga!
Ogni Sabo la xe l'istessa storia:
de scôder i so bezzi lù xe çerto...,
e Domenega — e Luni! — el fa baldoria.
- 11.
Ricordo un zorno. Incontro a mi vegníva
dò sposi (dò artesani); el so fioleto
lu, in brazzo, el sbalotava...: un anzoleto
in scufieta çeleste! La patíva
la dona; i oci la se coverzíva
per vergogna...; tegnirlo suso, dreto,
la procurava, e de condurlo in leto,
perchè le gambe el vin ghe indebolíva.
Quel grupo, a ondàe, da rente me passava;
pianzèva la muger; st'altro tasèa,
e'l fantolin coi ànzoli el sognava.
'Erce!!.... I soldi che a béver lu spendéa,
sie zorni a mantegnir i sòi bastava!...
e, squasi, el fantolín mi ghe toléa.
