Inventarme vorìa qualche sugeto
Con qualche novità, che a la Sorela
De profito servisse e de dileto.
Una Comedia no sarìa per ela;
Ma pur da le Comedie se recava
Qualche senso moral, bon per la Cela.
Co gera in leto ruminando andava
Tra de mi le Comedie che ò composto
Per la so' Compagnìa famosa e brava.
E de la stampa l'ordene disposto
Me svegiava in pensier qualche argomento,
Che no me par dal monestier discosto.
L'onesta, per esempio, e el bel talento
De la Sposa Persiana, e el bon costume,
No sarìa da sprezzarse in t'un Convento.
Se tanto fa de la Nature el lume,
Quanto à da far de più chi à abù la sorte
De conosser del Cielo el vero Nume?
Se Fatima è costante al so consorte,
Quanto Maria Lugrezia al sacro Sposo
Sarà sposa fedel fin a la morte!
Che bruta bestia xe un Mario Zeloso!
Pezo, se d'Avarizia el vil difeto
Più secante lo rende e tormentoso.
Un esempio sì rio con più dileto
Fa le pute scampar dal matrimonio,
Corendo in brazzo de Dio benedeto.
