Sta pagina la xe stà trascrita, ma la gà ancora da vegner rileta.
- LA NINA CHE RIDE
- E
- LA NINA CHE PIANSE.
- LA NINA CHE RIDE
I.
Ridi!... – Ela la ride... E come bate
su i sassi bianchi un salto de fontana,
par che da i denti e da la boca sana,
come polpa de fragole in t'el late;
soto el convulso de le cose mate
che mi ghe conto, un timbro de campana
sia la so vosse, un nio1 de puti in nana,
o de pàssare svelte a pena fate...2
Ridi!... – Ela la ride, e da le spale,
dal sen, soto le scapole, dai fianchi,
come un mòvar de foie o un bàtar d'ale,
dal bel corpo de dona inamorada,
traverso el filtro de quei denti bianchi
se scrivoltola3 in çiel la so ridada!4