Sta pagina la xe stà trascrita, ma la gà ancora da vegner rileta.
Ghe l'ho dito a la mama: «Cissà mai
mama, quanti cavei se sbiancarà?»
Alsando i oci, par de drio i ociai,
l'à risposto ridendo: «Oh Dio, cissà!»
E la vecia a mestieri, par quel vissio,
quel porco vissio de voler sprotàr,
col deo par aria, l'à sigà: «Giudissio!»,
pò, l'è scapada in pressia al fogolar...
A la note, dormendo fisso fisso,
me son sognado de trovarme al specio,
e me vedeva puteleto risso
scapar da casa par tornar più vecio;
dal sofito piovea come una bruma,
che se fermava su i cavei par dir:
quando s'è veci el corpo se consuma,
quando s'è veci bisogna morir!