La formigola
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Un pare coregeva el proprio fio,
El qual a altro atento, che badar
A le paterne voci, gera drio
4Le formigole in tera a numerar.
Cossa pensistu, à dito el pare, mai?
Vedendolo aplicà coi ochi a tera;
Te vergognistu sì dei to pecai?
8E ga risposto el fiol, ilare in ciera:
Stava, sior pare mio, pensando suso,
Che una sola formigola, che drento
Fusse entrada co l'altre là in quel buso,
12La vegniva a formar le cinquecento.
Ben da questo se pol la deduzion
Formar, quanto che i pari sia ascoltai
Dai fioi, quando i ghe fa la corezion,
16Dal paterno so amor infervorai.