Del Decreto della Franza
|
1789
|
|
Edission original: |
Giorgio Baffo, Raccolta universale delle opere di Giorgio Baffo veneto, Tomo IV, Cosmopoli, 1789 |
|
Fonte: |
Indice:Raccolta universale delle opere di Giorgio Baffo 4.djvu |
| ← Una gran compagnia d'Omeni doti | Edission e fonte ▼ | Zà, che son zonta ai ultimi confini → |
Del Decreto della Franza
Ve lagnè, o Gesuiti?
Anderè cussì all'usanza,
4No sarè più tanto affliti.
Metter suso un collarin
Ve sentì dell'amarezza?
Anzi fare un bel festin
8Dovaressi d'allegrezza.
Come, che no sè più Frati,
No sarè tanto osservai;
Poderè cussì da Abati
12Far l'amor da desperai,
Poderè cussì sentarve
Delle Donne alla Toletta,
E con elle solazzarve,
16E ziogar alla Bassetta.
Averè fatto 'l guadagno
D'andar soli zorno, e notte,
Senza quel Padre compagno,
20Che ve secca le ballotte.
No avere più ancuò la briga
De far scuola a sti ragazzi,
Ne farè la gran fadiga
24D'insegnar ai visdecazzi.
Più trà i miseri mortali
No anderè per Missionari
Ne farè più al Culo i cali
28A scaldar Confessionarj
Zà xe persa la fattura
Predicar la carità,
Che la zente ancuò paura
32Più del Diavolo no gà.
Contro 'l vizio no val gnente,
Che criè da desperai,
Perchè zà hà fissà la zente
36No se daga sti peccai.
Non occorre vegnìr vìa
Dell'Inferno coi terrori;
In ancuò l'è 'na pazzìa
40Da Poeti, e da Pittori.
Per correger el costume
No ghè più dottrine sane,
Giera meggio farghe lume
44Anzi a quei, che và a puttane;
Co volevi conservarve
Ghe voleva più giudizio,
No dovevi altro intrigarve,
48E a seconda andar del vizio.
Vù dovevi a più no posso
Far dei bei peccai d'accidia,
Che no v'averessi addosso
52Tirà tanta gran invidia;
Studiar tanto no dovevi,
Ch'a studiar continnuamente,
L'è un rimprovero, che devi
56A quei, che no studia gnente;
Bisognava, che no fessi
Tanto i Santi, nè i devoti,
Ma piuttosto a far ve dessi
60I ruffiani, e i zerbinoti.
Averessi assae più dà
In tel genio alle persone;
Se v'avessi immascherà
64A sentir le vostre Done.
No dovevi veramente
Negoziar de tante strazze;
Ma dovevi solamente
68Negoziar delle ragazze;
Ma v'avviso, ch'anca i Preti
No farà negozj boni,
S'i sarà tanto indiscreti,
72Voggio dir secca-cogioni;
Se volè trovar fortuna
In la vostra proffession,
Dovarè de qualcheduna;
76Procurar la prottezion;
Dovarè farghe i braccieri,
Aspettar de dirghe Messa,
Darghe drìo ai so pensieri,
80Se la xe filosofessa.
Una qualche gran Signora,
Che servìa d'un boccon grosso
Ve puol far avere ancora
84Un dì, o l'altro un capel rosso.
A sto passo cussì alto
No saressi zonti mai
Senz'aver fatto 'l gran salto
88D'esser Frati desfratai;
E de più podè arrivar,
Co un gran nome v'avè fato;
El Conclave a cogionar,
92E portarghe vìa 'l Papato;
Perchè sempre hò sentìo dir,
Che, se i dà 'l Papa a Gesù,
El se lo vorrà tegnir,
96E nol lo darà mai più.
Gesuiti pò no siè,
Per mi digo, è meggio assae,
Perchè un dì cussì podè
100Deventar so Santitae.
Podè in somma in sta maniera
Tiorve tanti gran solazzi,
E star via tutta la sera,
104E tegnirve anca i ragazzi.