Venezia sbloccada
|
Edission original: |
Antonio Piazza, Venezia sbloccada, Venezia, Francesco Andreola, 1814 |
|
Fonte: |
Indice:Venezia sbloccada, ottave de Antonio Piazza, Venezia, 1814.pdf |
| Edission e fonte ▼ |
Come l'aria al parlar xe necessaria,
El spirito vital al movimento,
El pan all'appetito, e a chi zavaria
Per la freve la china xe un portento;
Come al fruttar ghe vuol la stagion varia,
E alla navigazion propizio el vento,
Cussì perchè Venezia abbia un ben certo
Ghe vuol sempre el so mar libero, e averto.
Nata a tocchetti, e per scansar el giogo
Dell'Unnica barbarie, ella s'è vista,
Sottratta dei nemici al ferro e al fogo,
Crescer, unirse, e farse bella in vista,
Ed in vasta città cangiarse un liogo
Da menar vita solitaria e trista,
Pascolo da coccali e masanette,
Deserti Lidi, e povere Isolette.
Xe la sola virtù bastante a far
Prodigi de sta sorte, e quel sincero
Amor de libertà, che sà frenar
Del Dispotismo el sanguinoso impero;
No quel furor da matti popolar
Contro el Poter giusto, soave e vero:
Carta che in Anarchia maniza e zioga
El furbo, l'assassin, el demagoga.
Cussì l'opere eccelse, e í gran lavori,
Monumenti de gloria, e de ricchezza,
Che al Pubblico ha costà tanti tesori,
E fa che sta Città tanto se apprezza,
Xe fruto delle cure, e de' sudori
De zente incanutia nella saviezza,
Nemiga delle risse e della guerra,
Che ha pensà sempre al mar più che alla terra.
E quando che cambià se ha sto sistema
Xe andae tutte le cosse in decadenza,
No ghera più quella ricchezza estrema,
Nè le prime virtù de permanenza;
Pur tra finto coraggio, e vera tema,
D'un commercio esclusivo anca in assenza,
Insin ai nostri dì giera restada
Venezia una Città sempre stimada.
Nè la rivoluzion del Continente
Ha portà sul so cuor colpi assae forti
Sintanto che i Marcanti, e la so zente
Ha buo per traffegar liberi i porti:
Ma quando da lontan più nè d'arente
Roba no và nè vien, nù semo morti
Fatti un centro de pianti, e de lamenti,
Tra l'orror, la miseria, e fame, e stenti.
Un blocco de sie mesi el xe un flagelo
Da Testamento vecchio, una rovina,
Un castigo de quei che manda el cielo
Quando alla sua vendetta el ne destina:
Quel che questo puol far no puol far quelo,
E in una gran popolazion meschina
Presto a magnar reduse anca el curame
Del mal la conseggiera arida fame.
Sto estremo se temeva: i poveretti
No trovava farina ad alti prezzi,
E in vece de polenta, de' panetti
Piccoli ghe costava molti bezzi;
A cercar carità giera costretti
Tanti che in prima a ben trattarse avvezzi
No gaveva un dì mai la panza piena
Nè più parlava de disnar o cena.
Che spettacolo orrendo ai cuor sensibili,
Veder piene le strade, e pieni i ponti
De spetri, de cadaveri terribili
Dreti, in zenocchio, e in parte al viso sconti:
E tra questi, per render invisibili
Ai passeggieri i vergognosi fronti
Donne coverte con dei fini veli,
E dei gentili, e ben vestj puteli.
E quel sentir un cupo mormorio,
Un fremito dolente e lagremoso,
Un coro sepolcral, che prega Idio
Perchè el mova a pietà del bisognoso;
Quel veder a zirar avanti e in drio
Ste anime desperae senza riposo,
L'era un martirio per l'umanità
Che vorrave, e no puol far carità.
E no bisogna farse maraveggie
Se le strade, e i caffè tutti impeniva
De tante miserabili fameggie
La summa trascendente ed eccessiva;
Sarà piuttosto da inarcar le ceggie
Quando se pensa, che l'ha tegnua viva
La pietà Veneziana in dei momenti
Che tutti giera afflitti e malcontenti.
De Carità la Con-gre-gazion,
Le Fraterne dei poveri, le ha fato
Tutto quello de grando e bello e bon
Che permetter podeva el loro stato,
Ma mile non val mai per un milion,
E co el bisogno è tanto smisurato
Un Popolo ghe vuol, che daga man
A chi casca da fame, e vuol del pan.
Sto Popolo ghè stà, che le scarsele
S'ha svoda per sfamar sti miserabili,
Che al son d'alti lamenti, e de querele,
Se lo comprava a cari prezzi instabili.
Musa, in sto mar no voi calar le véle
Benchè veda dei scogi inevitabili:
Dirò, che in mezzo alla comun disgrazia
L'omo l'homini lupus mai se sazia.
E come appunto una sanguetta ingorda
Co alla pelle del povero el se tacca
De destaccarse mai nol se recorda,
E s'altri pena nol ghe pensa un acca.
Oh zente degna de baston e corda,
Quando sarastu mai discreta, e stracca
De far fortuna su chi pena e langue,
Cavandose la se con el so sangue?
Tiremo un velo su sta scena negra,
E accostemose al cuor del mio Soggetto,
Che dall'esempio renovà de Flegra
Ora el vindice ottien celeste effetto:
Passemo respirando a vista allegra
Ch'el cuor ne averza, e ne dilata el petto,
E voltemose tutti a chi s'avanza
La nostra a realizzar dolce speranza.
Comparsi sulla piazza all'improvviso
Un Uffizial Austriaco ed un Inglese,
Do Anzoli cascai dal paradiso
No podeva tra nù far più sorprese:
Tutti correva per vardarli in viso:
El tumulto, e le ose mal intese,
La strada tölta, ha fatto che confusi
I resta qualche puoco, e storza i musi.
Mala rason, che presto disinganna,
Cari gha resi sin quei stessi ostacoli,
Che no de crucifige, ma de osanna
Giera quei gridi popolari: oracoli
D'una nazion sconvolta, che s'affanna
Vedendo cosse, che ghe par miracoli,
Perchè delle soe tragiche rovine
Lieto e vicin no la sperava el fine.
Bisogn'anca saver, che in ogni guerra
Tra le Potenze in mar più grande e forti,
I Veneziani è stai per l'Inghilterra
Sempre parziali spasemadi morti,
E che ne manca assae quando se serra
All'Inglese commercio i nostri porti:
Rason sora rason de quel gran chiasso
Segno leal de godimento e spasso.
Nè stupir se dovrà de quel trasporto
De giubilo comun, e dei so eccessi;
I Veneziani no gaveva torto
Temendo de restar più a longo oppressi:
Se diseva ogni dì: nù semo in porto,
E ogni zorno regnava i mali istessi
Con certi segni, che indicava in sorte,
A mezza la Città sterminio e morte.
Per questo all'improvviso una comparsa
Nuncia de certa Pace, in cuor de tutti
Una vera allegrezza ha infusa e sparsa,
E festosi, e baccanti li ha redutti,
E la malinconia la xe scomparsa
Dai musi tetri, lagremosi e brutti
Dando liogo ad un riso consolante,
E moto de saltar anca alle piante.
Giera tante man morte i barcarioli,
I burchianti, i peateri ed i facchini,
E chi scortega i manzi, e i squeraroli,
E quei che a vender và trippe e penini;
Ma chi gaveva risi, o pur fasioli,
Pensava a convertirli in dei zecchini,
E per quanto ognun pianza, e se lamenta,
Gieri i valeva diese ed anquo trenta.
Credeu, che no ghe fusse provvidenze,
E leggi, e prescrizion, e vigilanze?
Che no se minacciasse de sentenze
L'uso del monopolio, e le speranze?
Ma quando el mal nel cuor gha la semenze
El delude el rigor, e le so usanze,
E in mezzo a sti contrasti, e a sti flagelli
Le vittime xe sempre i poverelli.
E questi aveva ben rason da vender
Se sottratti a sta peste botteghiera
I se vedeva all'apparir e stender
De' Segni Austriaci, e della soa Bandiera,
E se i voleva un testimonio render
Della sua gratitudine sincera
A quei che ghe portava la letizia,
E serrava la gola all'avarizia.
Manifesta la resa della Piazza
Segni no ghe xe più de carestia,
Nell'abbondanza el Popolo se sguazza
Ringraziando de cuor Gesù e Maria;
Assai puoco ghe vuol perch'el se fazza
La polenta, che avanti era fenia,
E con pochi centesimi el se tiol
Risi, fasioli, e tutto quel ch'el vuol.
Sta roba giera quà, la fusse sconta
Per ingordisia, o per l'armada unita,
Ed in momenti la s'ha visto pronta
Ajuto a dar, sostentamento e vita;
La Terraferma pò n'ha dà la zonta
Co tanta e tanta in quantità infinita
Da consolar nelle so mostre esterne
Chi aveva soldi, o che sperava averne
Qualche spirito torbido e maligno,
Me dirà forsi co un'occhiada storta,
Sto avvenimento, ch'è tanto benigno,
Finalmente per nù qual ben ne porta?
Chi tornerà a impenirlo el vuodo scrigno?
Dalla mendicità, che giera morta,
Come più liberarse? e come mai
Tante piaghe sanar, e tanti guai?
Come? respondo mi con un Governo
Che no magna i so fioi come Saturno,
Ma che sempre leal, giusto, paterno
De' sudditi al ben star lassa el so turno;
Che no li scarna sin all'osso interno
E che no rompe el suo sonno notturno
Strappandoli dal sen dei so congiunti
Per mandarli a morir su tutti i punti.
Che ostentando moral, costumi, scienze,
Fa nascer le passion, fomenta el vizio,
E vendendo del ziogo le licenze
Mette i fioi de fameggia al precipizio;
Che assae severo a pronunziar sentenze
La colpa no previen nè el pregiudizio
Coll'insegnar, e metter in azion
La virtù, la dolcezza, e la rason.
Un Governo da questo assae diverso
Xe quello, che ha da renderne felici,
E al confronto più duro e più perverso
Farne tornar l'uno dell'altro amici,
Che la cossa a vardar ben da ogni verso,
No se gha i numi mai tanto nemici
Che quando i ghe comanda ai so destini
De dividerne in Guelfi e Gibellini.
Cussì dirave a chi coraggio avesse
De spudar el velen sora del miel,
E che stemprar per mal umor volesse
Su ste mie predizion tutto el so fiel:
Ma per le grazie che ne vien concesse
In sti momenti dal pietoso ciel
Godemo del presente, contemplando
Un ben nell'avvegnir molto più grando.
Quante e quante botteghe adesso averte
Giera nei scorsi dì tutte serrae,
E dal vacuo meschin a esser coverte
De roba da magnar le xe passae;
Prezzi discreti, e le tariffe certe
Per chi gha da comprar vuol dir assae,
E trovar quel che occorre, e zorno e notte
Xelo un ben od un mal? disè marmotte.
Xe un ben, o un mal, che mille brazzi e mille
In acqua, e in terra sia messi in lavoro,
E chi gnanca gaveva pan e schille
Abbia dal so mistier cibo e ristoro?
Xe forsi ben, o mal che le pupille
Tutte bagnae dal pianto de martoro
Molti s'abbia suga, perchè i guadagna,
E adesso el pan de carità no i magna?
Oh! ghe ne resta tanti.... el so anca mi;
Ma quanto manco i xe xe manco el mal,
E intanto se remedia, e de dì in dì
Se acquista qualche ben vero e real:
Chi nei cantieri marcantili, e chi
Troverà da impiegarse all'Arsenal:
El genio nazional, l'arte, l'inzegno
Tutti i ossi tornar farà al so segno.
Ma l'opera più granda e la più bella
De tutte xe la libertà del mar,
Che quando l'era ancora verginella.
Venezia ogn'anno usava de sposar,
Onde cussì da questa parte e quella
Adesso alfin se puol vegnir e andar,
E ogni ostacolo vinto, ogni timor
Far che torna el commercio in vita e in fior.
Vedo xa bastimenti in quarantena
E del transito molti alla dogana,
Nei squeri da vassei vedo una piena
Che i capi mistri e i lavoranti affanna,
E me rallegro alla ridente scena,
Che spiega la bravura, e l'arte umana
Nella fila de barche e de barconi
Ferme longo la riva dei Schiavoni.
Tutto xe movimento, azion, laorier,
De partenze, e de carichi apparecchi;
Tutto esercita e nutre ogni mistier
Intorno ai bastimenti e novi e vecchi,
Che alle so poppe ne farà veder,
Adorne tutte de pitture e specchi,
Quella mai sempre riverita e degna
Dell'Austriaca Potenza eccelsa insegna.
Sott'auspizi sì fausti e gloriosi,
El ceto mercantil farà fortuna,
E i nostri capitani valorosi
Affronterà senza temenza alcuna
I accidenti del mar pericolosi,
Per lori com'el fusse una laguna,
E i tornerà della so patria in sen
Accrescendo i so gusti ed el so ben.
Possa l'augurio mio verificarse,
E far presto veder se giusto parlo,
In forme che no sia ristrette e scarse,
A prò del bon Rossin, l'amigo Carlo,
Ch'uno de' primi xa sarà a portarse
Dove forsi più d'un sta ad aspettarlo,
In Cipro, e in Alessandria onde portarne
Caffè, datoli, vin da ristorarne.
Pitocchi minoradi in quantità,
E dazj de consumo assae minori,
Viveri in abbondanza a bon marcà,
Molta zente, impiegada nei lavori,
Proclami de giustizia e umanità
Che de belle speranze inonda i cuori,
Ha fatto sparir via la scena tragica
Co una prontezza da lanterna magica.
De fatti, Patria mia cara e diletta,
Messa gieristu in prima de sti zorni?
Affamada, languente, poveretta,
Mentre più d'uno te faceva i corni,
E a faraon zogando, e alla bassetta
I magnava i fasani ed i cotorni
Mentre ti te accostavi all'ore estreme
Che ha fatto un dì perir Gerusaleme.
No è stà punido qualche temerario
Nelle imprudenze sue, perchè a Venezia
El Popolo no è niente sanguinario,
E el se sfoga coll'urlo, o la facezia:
Se via de quà successo xe el contrario
Ed altro che una baja ed una inezia
L'esempio no gha mai trista influenza
Per far che quà se perda la pazienza.
E ringraziar dovemo Gesù Cristo,
E la Beata Vergine so madre,
Che in mezzo a tanti guai no s'abbia visto
Commetter delle azion inique e ladre;
E che sia sta tutto sì ben provvisto
Per l'andar e vegnir delle do squadre,
Che senz'alcun timor, e senza smania
Semo passai da Franza in la Germania.
E quanto caro a nù sia sto passaggio
L'ha dimostrà Venezia tutta, in sette
Dì de prucissional devoto viaggio
Delle parrocchie a trentado ristrette:
Ognuna ha reso el più solenne omaggio
De grazie riverenti, a quel dirette
Ch'è Dator d'ogni ben, con raro esempio,
De San Marco nel sacro augusto tempio.
El son delle campane, e l'apparato
Dei pendenti tappei sora le strade,
El canto musical semplice e grato
Che se alzava al passar de ste contrade,
El consumo eccessivo e smisurato
De tante cere in prucission portade
E un giubilo comun e venerando
Sto settenario ha reso memorando.
E quel Triduo no ha buo minor concorso
Che in prima per el Papa è stà eseguido,
Co del so arrivo a Parma era xa corso
Sull'ale della fama el fausto grido:
L'isola d'Elba è destinada al Corso
Che lo voleva al so dover infido
Ed Ello torna ad occupar la sede
Del valor vero, e della vera Fede.
Onnipotente Iddio quanti prodigi
Scaturidi dal sen d'alte sventure!
El sangue dei so re torna a Parigi
Dopo tante vicende acerbe e dure;
E sotto el successor del bon Luigi
Martire de passion vili ed impure,
Forsi quand'ella avea manco speranza
El suo primo splendor torna alla Franza.
La casa de Savoja, e quella d'Este,
El dominio ch'è suo va racquistando,
E la bella Toscana è tutta in feste
Accogliendo el so amato Ferdinando:
Manto repubblican Genua riveste,
Parma esulta e gode a sè aspettando
In Luigia Maria la sua sovrana
Amabile, cortese, giusta, umana.
A sto bel colpo d'occhio, e chi xe quelli
Che restar possa sconoscenti e ingrati,
De valor, de virtù verso i modelli
I magnanimi Prencipi alleati?
O, della patria mia cari fradelli,
Lori el merito gha se i ne ha sottratti
Da un duro giogo, e dal flagello estremo
Dell'abbiam decretato e decretemo.
Per lori del gran rischio semo fuora
De magnarse l'un l'altro, e crudi e vivi,
E la nostra Città la và per sora
De quanto el blocco ne tegniva privi;
Per lori xe spuntà la bell'aurora
De libere partenze, e lieti arrivi,
E xe restituido all'atto pratico,
Spezzada la caena, l'Adriatico.
Per lori da un abisso el più profondo
Tante nazion alzerà sù la testa,
Formando un bel spettacolo giocondo,
Come l'Iride dopo la tempesta:
Domar l'orgoglio, e dar la Pace al mondo
Qual opera ghe xe maggior de questa:
E chi mai puol lodar quanto convien
I Autori coronai d'un sì gran ben?
Piacque all'Autore di scrivere questo Componimento, che uscir doveva in luce non pochi giorni prima, nel suo dialetto Veneziano, ma non Venezianissimo: anzi si permise alcune voci Toscane, o all'opportunità della desinenza o a quella del miglior suono del verso. Questo arbitrio non riuscirà discaro alle orecchie avvezze alla estemporanea forense eloquenza, che l'usa felicemente; ma sarà forse biasimato da quei che scrivendo nel nostro vernacolo s'attengono più al suo gergo, che a quella italiana eleganza di cui è suscettibile.