Venezia in tochi
|
Edission original: |
Molena Spinacarpio, Bordizàndo, rime veneziane, Venezia, 1903 |
|
Fonte: |
Indice:Spinacarpio Moléna, Bordizàndo, rime veneziane, Venezia, 1903.pdf |
| ← A Zêna | Edission e fonte ▼ | Do corpi e un'anima → |
Venezia, 20 Novembre 1902
Tornà geri da la Spezia
mi so' proprio quà de sasso
a vardárme sta Venezia
tuta quanta in gran sconquasso:
e no posso darme pase
che del nostro Campanil
più no resta che una base,
vero avanzo d'un fieníl.
Là darénte, nel palasso
de l'antica Libraría,
un gran buso, anzi un busasso,
co' le tole soravía:
a la Ciesa sconquassada
manca i tochi quà e de là,
e ai cavái de la fazzáda
zate e panza i gà imbragà.
Par che tuto quà se sfazza,
par che regna la malora;
voda e squalida la Piazza
ga el salizzo soto e sora:
e fin la Procuratía,
dove proprio ghe xe el bón,
par in túnel convertía,
par dei salti un baracón.
I foresti imatonídi
scaturii la testa sporze,
a Venezia impensierídi
de no far la fin del sorze:
quei de Piazza che più mole
gà le suste, pe' sto afár,
de le note Cassaróle
và el concorso a radopiár.
Co' sto afár de l'armadura
ghe xe proprio la disdéta;
ga le done gran paura
fin del crach d'uná cocéta:
tuti i busi che gh'è atórno,
sempre drío le xe a tastár
in pensiér, de giorno in giorno,
che no i s'abia da slargár.
Che la sia, po', salda in pope,
o la sia là, per le ore,
fato stà che, messa in strope,
de San Stefano la tore,
co' grizióle da ogni parte,
quel castélo proprio par
che, col mazzo de le carte,
sù i putéi fà per zogár
E in consiglio, a Cà Farséti,
ghe xe i nostri parucóni
sempre imérsi nei progeti
per tegnír suzo i cantoni:
mentre, intanto, fra el sconquasso,
sta più drita d'un farál
la coa longa qualche brasso
de la zonta comunal!
(Dal Tonin Bonagrazia)