Ma a sto mondo maledeto
no gh'è rosa senza spin.
Quando manco me l'aspéto
no me vedo, a tavolín,
rente a mi, là, drio a fár ciasso
quatro amiçi, del bon ton,
vegnúi là per torse spasso
de Moléna capelón?!..
E i me fava moti e sesti
che aludéva al stato mio,
e i trovava dei pretesti
per passarme avanti e indrío..
Mi, che píén so' de giudizio,
gnente, duro, mondo can:
no se scherza, de servizio,
co' la patria ne le man!
Ma piú mi tegníva saldo
più quei mami cogionava;
e, passà che me xe 'l caldo,
forsi forsi ghe molava:
quando intanto, mondo tondo,
zó dal ponte, de ficón,
végnir vanti vedo, in fondo,
el tenente de ispezión!
