Messi in fila gh'è i faráli
co' quel'aria incocalía
da impiegati comunali,
che a momenti i se diría
tanto mola avér la boca
per el barbaro destín
che la parte che ghe toca
sempre sia de far lumín.
Co' la luna l'aqua a trati
par velúdo descolà
co' d'arzento gran bisáti
che se slanza quà e de là:
da una parte fa da sfondo
la Giudéca, el Redentór,
da quel'altra el Lido, in fondo,
tuto in brio, tuto in ciarór.
Gh'è le barche del treghéto
che le par indormenzáe,
co'l so mato faraléto
ocio averto.. a le pontáe:
gh'è el tramvái, fra el ciaro e el scuro,
ch'el vién vanti co' quel ton
svelto, rigido e sicuro,
che vol dir: Xe quà el parón!
