ma un scalin proprio me crede
çerti tochi de servòta,
che me salta sù de bota,
e che sà da sbrodeghin.
Sempre, pò, bruta maniera,
sempre un monte de insolenze..
le asenàe, le sconvenienze,
zà, co' mi, va sempre ben;
i me dixe fin sul muso:
Varda, ciò, che bruta bestia!..
E, co' tuta la modestia,
gà ogni bissa el so velén.
In compenso a sto servizio
i me dà de la salàta;
e i me trata, pò, da mata,
e i va un toco drio a çercàr,
quando, stanca del suplizio,
del desio che i me gà fato,
queta, queta, me la bato,
senza gnanca saludàr.
Che bastasse pararía,
ma, gò proprio la malóra:
qualche mamo dixe fora
che so' bona da magnar!..
