El bistéch me par caválo
e pò tremo, nel spezzato,
che sia forsi, cussì, in falo,
sbrizzá drento qualche gato:
el formagio xe sgnanféto,
e el salame sarà bon
ma, de porco, ghe scométo,
no'l conosse ch'el parón.
Gh'è l'oposto de sto quà
co' a disnár so' da la Nina:
sempre in punto la me fà
roba fresca e roba fina:
quela sì che xe cusina!...
E po' dopo, a dirla quà,
el viséto de la Nina
l'osto çerto no lo ga.
