Le riflessión de Sior Momi
Me volévo a vint'ani maridár,
e fra le conoscenti, a man a man,
per no torme una gata da pelár
mi façeva i mi studî a pián a pián.
Ma ghe ne gera trope, mondo can,
che 'l cuór le me façeva palpitár;
sichè ò dito: Ciò, Momi, andémo a pián:
xe poligamo l'omo, a quanto pár!
Ma co' go visto, po', par ste contráe,
tante done che a fianco a só marío,
passando, le ve buta çerte ociáe
che le ve brusa, ò dito: Eh, no parbío,
che in sto afár che xe qua no i me mincióna:
xe poligama, cassa... anca la dona!
