A Zêna[1]
Sui muri de la Cava so' a bonóra,
e le bianche to case, e la marina,
e i palassi, e la to lanterna indora
el sol che spunta drío da la colína.
Fresca come una rosa matutina
in mar ti sporzi al monte stando sora,
come una bela dama montanina
che ga el çesto ben saldo, e el peto in fora.
Si, me piase sto porto proprio d'oro,
sta ruvida ma, in fondo, bona zente
che tanto se scalmána adrío del boro:
e sta vita, e el bordélo che se sente,
e sta smania afanósa de lavoro...
tanto più, pò, che mi no fasso gnente.
- ↑ A Genova.
