El monumento de Vitorio a Roma
Xe dei gran ani che parlár mi sento
su sto colosso fra i monumentóni
per Vitório, là, a Roma: e ogni momento
se sentiva al Cafè, da sti trombóni:
― Ma, insóma, cossa falo sto Sacóni?
El sarà belo, sì, sto monumento,
ma, valo suzo, opúr va sù i milioni?...
La fiaba la ne pár de Siór Inténto.
Ma desso se va fora da sti afáni:
gò leto proprio ancùo che terminà
el sarà, finalmente... fra set'ani!
Dio sia lodato, e sia la verità:
perchè, se suçedesse altri malani
el xe ai posteri propio destinà.
