In secretessa
Voráve dirve in recia uná parola
(perchè staráve fresco, se i me sente!)
ma mi go squasi el dubio che la scuola
la strada sía per no imparár mai gnente.
Vardé el latín: a Roma, anticamente,
anca i putéi savéva ogni parola;
ma, cressúde le scuole, finalmente
l'è restà dei studiosi lingua sola.
Pò al Liçeo pian pianín l'à cominçià
a far de man in man manco furori:
desso, anca ai tosi d'Università
quasi quasi el ghe pár turco a lori...
No xe ciáro che, de sto passo quà,
presto no lo sà gnanca... i professori?
