Salta al contegnùo

Pagina:Siè cantè sora la villa colla zonta d'altre composizioni sora el Vendri Gnoccolaro de Verona, 1784.pdf/21

Da Wikisource
Sta pagina la xe stà trascrita, ma la gà ancora da vegner rileta.


No me disessi mia che le Cittè
     Se no ghe fusse, no ghe sarea gnanca
     Quei che da leze, e ne ten goernè,
     E che regola el mondo, e che se manca
     El governo mazzoro, e i Grandi, e i Rè,
     E in somma no ghè fusse quei de banca
     Che tegnesse el Registro, la sarea
     Na babilonia el mondo, e 'l fenirea.

Perchè mi no ve digo, ve respondo,
     Che ne gh'abbia da esser quei che reze,
     E ne fà da Patroni in te sto mondo;
     Perchè ogni corpo senza ordine, e leze
     Và a tanfurlon confuso in tel profondo
     Delle miserie, e zà ogni alloco el veze,
     Ma posso dirve che quei del goerno
     I pol star sor con nù l'Istà, e l'Inverno.

Senza voler serarse in sti gabbioni
     Delle Cittè, ma como al tempo antigo
     Fora in campagna sotto i so tendoni
     De zà, e de là zirando, e chigo, e ligo
     Come ghe par e piase, e da Patroni
     Tanto, e tanto guardar dall'anemigo
     I to confini, e star sora in Campagna,
     Che scotta pur el Sol, che l'acqua bagna.

Che usandosse così forti, e gagiardi
     Che stando al pal se faria fronte ai venti,
     No se narea con tanti gran resguardi
     De fadighe, de incomodi, e accidenti,
     Forse la morte vegnaria pì tardi,
     O alman nò ne faria tanti spaventi,
     O se direa: vè pur no so che farghe,
     S'ho da morir alman moro alle larghe.