segreto? Gastu visto come che 'l me vardava l'avocato Giostra co ghe parlavo del monumento? Ti sa cossa che i diseva qua in paese, de i mii progeti: «roba da mati!» Mi esagero.... ma lu el crede che mi sia mato.
Ride.
Ti dovaressi far finta anca ti. Ghe lo vogio dir a Piero. Le matae come prima, nualtri no podemo più farle: semo veci, ne dol i ossi.... e gavemo fato çerte fadighe!... Te ricordistu? Cussì, col sistema che go trovà mi, se pol sempre aver dirito a l'usufruto senza che nassa de le question. Ti vedi che l'avocato Giostra el xe diventà bon. El gà molà. Mati, gavemo de esser, se no la società non esiste e non esistono le persone giuridiche.... come galo dito? Mati. Ma xè megio far finta de esserlo, stando in leto.... No te par che sia giusto quelo che digo?
Entra Sioria, lo segue Ginetta.
Oh, bravo, Sioria! E ti, Gineta, parecia che fra un'oreta torno. Me gala fato la polenta la Nana?
