EL SCOLARO
Ciapa qua ciapa là, tuto el scomenza
Pien de coragio e co la freve adosso;
El tol fra i libri el volumon più grosso:
El lo volta, el lo zira, el s’indormenza.
El studia i verbi rosegando un osso,
Analizzando el sbisega in credenza,
E per meterse a far qualche sperienza
El suga e sgionfa dei polastri el gosso.
Primo esercizio co 'l vien via de scola
Xe de dar scopeloti a i so fradei,
E bater scherma co i pironi in tola.
El se forbe la pena in tei cavei,
Tuta la casa co l'ingiostro el bola,
E trasforma i so temi in tanti osei.
Se la mare ghe fa un’osservazion,
Strenzendose le spale nol l’ascolta,
Sinchè no la lo fica in un canton.
Eco quelo che gerimo una volta!
