EL MOLINER POLTRON
Col muso sporco, l’ocio incagolà,
I brazzi a picolon, le gambe storte,
Quando 'l camina par che 'l vada a morte,
E quando 'l parla, che ghe manca el fià.
No 'l se neta el scarpon infanganà,
Mai no ’l saluda quando l'intra o sorte,
No 'l se scompone de serar le porte
Co 'l vien a tor la paga al mio mezà.
Ecolo là, co la pipeta in boca,
Che 'l studia un’ora a quel che l’à da far;
Ma l’aqua core e masenar ghe toca,
Gratandose la recia o 'l mapamondo,
Prima che 'l se decida a laorar
Zira tre volte una lumaga el mondo.
