Pagina:Rime in dialetto veneto di Polifemo Acca.djvu/19

Da Wikisource
Sta pagina la xe stà trascrita, ma la gà ancora da vegner rileta.

E tirando su e zo la capelina
Quindese volte el scassa la testina,
Restando un'ora co la felpa in man
Come l'orbo ch’aspeta el carantan.
Co le zampe davanti a picolon,
Tegnindose l’ombrela soto 'l brazzo,
El va zirando intorno a zopegon
Come chi tenta caminar sul giazzo,
E scoverzendo la zentil sirena
Par che 'l se storza el filo de la schena.
Tirando una carega al taolin,
A onza a onza el ghe se fa vicin;
EI ghe parla, el ghe ride, el la carezza,
El va in brodo de viole, el se imborezza,
E quando la fa segno,
D'andarsene, el xe là pronto a servirla,
A tegnirghe la borsa, a rivestirla,
A meterghe la siarpa sul scufioto,
A drezzarghe le pieghe sul daoto.
E come, terminada la funzion,
El vescovo scortà dal capelan
Fra mile repetoni1 se la moca,
El nostro cavalier
Sporzendo 'l brazzo a la so dolce arpia
In tuta gloria el se la porta via.

  1. Riverenze.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Rime_in_dialetto_veneto_di_Polifemo_Acca.djvu/19&oldid=71042"